Otsailaren 10ean Euskadi Lagunkoiako talde teknikoa eta udalerriko talde eragileko kideak elkartu dira programak Legazpin izan duen bilakaera ezagutzeko.

«Euskadi Lagunkoia sarea 74 euskal udalerrik osatzen dute gaur egun; horietatik 26 Gipuzkoakoak dira, 29 Bizkaikoak eta 19 Arabakoak», Udalaren arabera. «Legazpi udalerri parte-hartzaileetako bat da. 2022ko azaroan, gure herrian, Gipuzkoako lurralde-batzordea egin zen, Marian Olabarrieta Eusko Jaurlaritzako Gizarte Zerbitzu, Berdintasun, Justizia eta Gizarte Politiketako zuzendariak parte hartuta», gogoratu dute Udaletik.

«Lurralde-batzorde horretan, Euskadi Lagunkoiari atxikitako Gipuzkoako udalerriok sei erronka proposatu genituen 2023an lan egiteko: bakardadea, parte-hartzea, etxebizitzak eta egoitzak, adinkeria, sare-lana eta belaunaldien arteko harremana», zerrendatu dute. Gipuzkoako proposamen horiei Bizkaiko eta Arabako lurralde-batzordeenak gehitu zitzaizkien. Horien guztien bateratzetik atera da, azkenean, 2023an zehar lan egiteko erronka, 'parte-hartze soziala eta herritartasun aktiboa sustatzea'.

Helburu horrekin, Euskadi Lagunkoiak bere talde teknikoaren laguntza eskainiko du, udalerri bakoitzeko talde eragileei laguntzeko eta aholkuak emateko.